لسة السؤال عن هويتنا السودانية مطروح ومالاقين ليهو اجابة لا بالاتصال بصديق ولا بأخذ رأي الجمهور ولا حتى وسيلة قرداحي الجديدة رأي المستشار جابت نتيجة. ورغم انو في كتير ندوات وبحوث ومواضيع اتعملت بس كل دا ولسة السؤال في مكانو نحنا عرب ولا زنوج؟؟

رغم انو سؤال بسيط بس الناس ماقاددرة تحدد عشان مافي تعريف محدد للهوية ولا معايير ومواصفات واضحة يحددو بيها اذا كنا عرب او لا. ساعات يقولو على حسب اللغة واللسان يعني هسة اذا في خواجة اتكلم عربي ممكن نقول عليهو عربي؟ ومرات يقولو حسب الملامح وحددو ملامح العرب بالشعر الناعم واللون الابيض بس عندنا في السودان تشكيلة عجيبة بنلاقي ناس شعرها ناعم ولونا اسمر وناس شعرها خشن ولونا ابيض. اما اصحاب الدقون فقالو انو الهوية تتحدد على حسب الدين وديل قالو انو المسلمين في السودان عرب عشان القران عربي ودا الرابط العجيب.وفي ناس الموضوع ما هايها وفي ناس من موضوع الهوية عملت حزب وفي الاخر عرب او افارقة افارقة او عرب ما فارق كتير انا هويتي محددة كلكوليــــــــــة.